फागुन २७, दाङ । महिलाको हातबाट साढे चारलाख बढी रकम लुटेर भागेका युवक प्रहरीको फन्दामा परेका छन् ।
घोराही उपमहानगरपालिका वडा नं. १३ की ४८ बर्षीया झुमा रोकाको हातबाट ४ लाख ६७ हजार ७ सय २० रुपैंया लुटेर मोटरसाइकलमा भागेका घोराही-९ का २४ बर्षीय गणेशकुमार डाँगीलाई केही बेरमै प्रहरीले पक्राउ गर्न सफल भएको हो ।
रोकाले आफन्तले भारतबाट पठाइदिएको उक्त रकम घोराहीस्थित दुई वटा बैंकबाट निकालेर घर तर्फ लैजाँदै गरेको समयमा बिहीबार दिउँसो तीन बजेतिर डाँगीले रकमसहितको पर्स लुटेर भागेका थिए ।
तत्काल रोकाले पैंशा नलाग्ने १०० नम्बरमा फोन गरि घटनाबारे बताएपछि प्रहरी परिचालन भइ डाँगीलाई नियन्त्रणमा लिन सफल भएको थियो ।
डाँगीको साथबाट लुटेर लगेको सबै रकमसमेत बरामद भएको जिल्ला प्रहरी प्रमुख एसपी सुरेश काफ्लेले जानकारी दिए । रोका पैंशा निकालेर अटो रिक्सा चढेर घर तर्फ आएपछि डाँगी मोटरसाइकलमा पिछा गर्दै आएका थिए ।
घर नजिकै पुगेपछि अटोरिक्साबाट झरेर पैदल हिड्ने क्रममा मोटरसाइकलमा सवार डाँगीले पैंशा रहेको हाते पर्स थुतेर भागेको जिल्ला प्रहरी प्रबक्ता डिएसपी मकुन्दप्रशाद रिजालले जानकारी दिए । पक्राउ परेका डाँगी बिरुद्ध लुटपाट तथा चोरी अभियोगमा मुद्दा चलाइने भएको छ ।
प्रतिक्रिया दिनुहोस