रोल्पाका गाउँपालिका अध्यक्षहरु ठुला योजना माग गरि काठमाण्डाैबाट फर्किए


फागुन १७, रोल्पा । रोल्पाका गाउँपालिका अध्यक्षहरूले संघीय मन्त्रीहरूलाई भेटेर योजना माग गरेर फर्किएका छन ।

१२ फागुन गाउँपालिका अध्यक्षहरूले सिंहदरबार पुगेर गाउँपालिकाभित्र पर्ने गरी आ-आफ्नो योजना प्रस्तुत गरी फर्किएका हुन।रोल्पा क्षेत्र नं.१(२) बाट निर्वाचित लुम्बिनी प्रदेश सभा सांसद दिपेन्द्र कुमार पुन,सुनिलस्मृति गाउँपालिका अध्यक्ष मणीराम बुढाथोकी, सुनछहरी गाउँपालिका अध्यक्ष धनबहादुर पुन, लुङ्ग्री गाउँपालिका अध्यक्ष भरत थापा मगर, परिवर्तन गाउँपालिका अध्यक्ष सुक बहादुर बुढा मगर, थवाङ गाउँपालिका अध्यक्ष ॠषिकेशव बुढा मगर र माडी गाउँपालिका अध्यक्ष अमरसिंह घर्ती मगरले प्रधानमन्त्री तथा मन्त्रीपरिषद्काे कार्यालय, सूचना तथा प्रविधि मन्त्री रेखा शर्माको मन्त्रालय, भौतिक पूर्वाधार तथा योजना मन्त्री नारायण काजी श्रेष्ठको मन्त्रालय र पर्यटन मन्त्री सुदन किरातीको मन्त्रालय लगायतमा पुगेर योजना माग गरि फर्किएका छन ।

परिवर्तन गाउँपालिकाका अध्यक्ष सुक बहादुर बुढा मगरले संघीय बजेटमा समेट्न ५ वटा विभिन्न आयोजना पेश गरेर फर्किएको प्रतिक्रिया दिएका छन । प्रधानमन्त्री तथा मन्त्रीपरिषद्को कार्यालयसहित विभिन्न संघीय मन्त्रालयमा बुढा मगरले गाउँपालिकाभित्र कृषि गुरुयोजना बनाएको बताउदै, आफ्नो पालिकाको प्राथमिकता कोल्ड स्टोर निर्माण गर्ने, किसानहरुले उत्पादन गरेका वस्तुले मुल्य नपाएको कुरा र अर्को बजारको सुनिश्चितता नभएको गुनासोलाई सम्बोधन गर्ने एउटा मात्र माध्यम भने चिस्यान केन्द्र निर्माण भएको बताए ।

सहिद मार्ग भनेर नामाकरण भएको आफ्नै गौरव, आफ्नै पौरख भनेर खन्न सुरु गरिएको र त्यसपछि गणतन्त्र नेपालको पहिलो प्रधानमन्त्री पुष्पकमल दाहाल (प्रचण्ड) हुँदा सहिद मार्गको रूपमा बजेट व्यवस्थापन गरि राष्ट्रिय आयोजनाको रूपमा अगाडि बढाएको उनकाे भनाई थियाे। उनले दाङ होलेरी, घर्तीगाउँ हुँदै थबाङसम्म पुगेको र उतिबेला दुईखोली, बागमारा हुँदै चुन्बाङ खण्डसम्म पनि बाटो खनेको बताए । तर त्यो अहिले छुट्न गएकाले दुईखोली, चुन्बाङ हुँदै रुकुमकोटसम्मको बाटो छुटेकाले त्यहाँका नेता, कार्यकर्ता र नागरिकले अहिलेको प्रधानमन्त्रीप्रती गुनासो गरेको जानकारी गराएकाे बताए ।

उनले भने “राेल्पा जनयुद्धको उद्गमथलो र आधार ईलाका हाे, देशको राष्ट्रिय राजनीतिमा यसले ठूलो परिवर्तन पनि ल्यायाे, त्यसैले राेल्पालाई (वार टुरिजम) युद्ध पर्यटनको रुपमा िवकास गर्नुपर्नेमा त्साे हुनसकेन, स्थानीय सरकारले भ्याएसम्म लागिरहेको छ ।” उनले राङ्कोट्को गोरीचौर देखि छड्के धुरी हुँदै, फूलबारीबाट थबाङसम्म जोड्ने “माउन्टेन बाईक ट्रेकिङ रोड” हिजो छापामार भनेर खन्न सुरु गरिएको र त्यो अझै पुरा नभएकोले बजेटको व्यवस्था गर्न माग गरेको बताए ।

वर्तमान प्रधानमन्त्री पुष्पकमल दाहाल (प्रचण्ड) तत्कालिन जनयुद्धकावेला बसेको परिवर्तन २ राङ्सीको डाँडागाउँमा रहेको घरलाई “युद्ध पर्यटन” केन्द्रको रूपमा विकास गर्न केही भौतिक संरचना निर्माण भइ रहेकोेले ध्यानाकर्षण हुने गरि बजेटको व्यवस्थापन गर्न आग्रह गरेको बताए ।अर्को बर्सादको समयमा बाढी पहिरोले खेतबारी कटान गर्ने भएकोले नदीहरुमा तटबन्धको व्यवस्थापन गरि दिन आग्रह गरि काठमाडौंबाट फर्किएको बताए ।

यस्तै माडी गाउँपालिकाका अध्यक्ष अमरसिंह घर्ती मगरले आफ्नो पालिकाको ५ वटा मुख्य योजना लिएर काठमाडौं गएको बताउदै पालिकामा २०८०/०८१ मा घर्तीगाउँदेखि झिनुवा हुँदै त्रिवेणी गाउँपालिकासम्म पिच गर्न माग गरेको बताए । माडी गाउँपालिका ५ को भाबाङ्मा रहेको पुल्बाङ धुरीलाई युद्ध पर्यटनको रूपमा विकास गर्न, माडी गाउँपालिका स्तरीय कोल्ड स्टोर निर्माण गर्न, घोरनेटीमा भएको जन नमूना अस्पतालको स्तरउन्नति गर्न र कालाभिर, जन नमूना अस्पताल हुँदै, जबाङ जोड्ने मोटरबाटो योजना लगाएत माग पेश गरेको बताए ।

त्यस्तै थबाङ गाउँपालिकाका अध्यक्ष ॠषिकेशव बुढा मगरले आफूले मुख्य ४ वटा योजना लिएर काठमाडौं गएको बताए । पर्यटनको हिसाबले जलजला क्षेत्रको विकास गर्न भौतिक संरचना निर्माण, खानेपानी, शौचालय निर्माण र बाटो लगायत निर्माणको लागि बजेट व्यवस्थापन गर्न माग गरेको बताए। साथै पालिकाको खेलकुद मैदान निर्माण गर्न, थबाङ्मा कृषि अनुसन्धान केन्द्र स्थापना गर्न र अर्को सहिद स्मृति संग्रहालय निर्माण गर्नको लागि बजेटको माग गरेको बताए।

गाउँपालिकाका अध्यक्षहरु प्रधानमन्त्री पुष्पकमल दाहाल(प्रचण्ड)लाई भेट्ने भनेर गएकोले पछिल्लो राजनीतिक घटनाको व्यस्तताले गर्दा नभेटेरै आफूहरू फर्किएको अध्यक्षहरुको भनाइ रहेको छ । अन्य रोल्पाका पूर्वी गाउँपालिकाका अध्यक्षले पनि आ-आफ्नो गाउँपालिका भित्रका स्थानीय बजेटले समेट्ने गरी योजना पेश गरेर फर्किएको बताइएको छ ।

१७ फाल्गुन २०७९, बुधबार को दिन प्रकाशित

प्रतिक्रिया दिनुहोस

ताजा अपडेट

धेरै पढिएको