जेठ ११, काठमाडौं । अखिल (क्रान्तिकारी)ले संगठनले आयोजना गरेको शान्तिपूर्ण कार्यक्रममा प्रहरीले दमन र हस्तक्षेप गरी विद्यार्थी नेताहरुलाई बिनाकारण गिरफ्तार गरी गैरन्यायिक तरिकाले हिरासतमा राख्ने र झुठा मुद्दामा फसाउने प्रपञ्च सरकारका प्रशासनले गरेको भन्दै आक्रोश व्यक्त गरेको छ ।

अखिल (क्रान्तिकारी)का केन्द्रीय अध्यक्ष चिरञ्जीवि ढकालले एक प्रेस विज्ञप्ति जारी गर्दै संगठनका केन्द्रीय समितिका सचिवालय सदस्य विरेन्द्र लुहार, संगठनको ललितपुर जिल्ला उपाध्यक्ष रमेश सुनार, क्याम्पस जिल्लाका सचिव तारा सन्ज्याल र सदस्य बुद्धहाङ राईलाई शुक्रबार राजधानीको शान्तिबाटिकामा तीन विद्यार्थी संगठनले आयोजना गरेको संयुक्त विरोध सभाबाट प्रहरीले बिनाकारण गिरफ्तार गरेको जनाउँदै गिरफ्तारीको भत्सर्ना र निन्दा गरेका छन् ।

सरकारले शान्तिपूर्ण कार्यक्रममा हस्तक्षेप गरेर राष्ट्रघाती, भ्रष्ट, जनविरोधी र फासीवादी कार्यलाई तीव्रता दिएको उल्लेख गर्दै फासीवादको विरोधमा उत्रिएका विद्यार्थीहरुलाई गैरन्यायिक ढंगले गिरफ्तार गरी यातनासहित हिरासतमा राखिएको विज्ञप्तिमा जनाइएको छ ।

७३ अर्ब लाभकर छल्ने एनसेल तथा बालुवाटारलगायत विभिन्न ठाउँमा सरकारी जग्गा नीजिकरण गर्नेमाथि कारवाही गर्न माग गर्दै र भोजपुरमा शान्तिपूर्ण गतिविधिमा संलग्न रहेका युवा नेता तीर्जराज घिमिरे राजुलाई सरकारले निहत्था अवस्थामा नियन्त्रणमा लिई कायरतापूर्ण हत्या गरेको विरोधमा शुक्रबारको विरोधसभा आयोजना गरिएको समेत अध्यक्ष ढकालले प्रष्ट पारेका छन् ।

विद्यार्थी नेताहरुको गैरन्यायिक गिरफ्तारले सरकार र गृह प्रशासनको असली फासीवादी मुकुण्डो उदांगिन पुगेको उल्लेख गर्दै गिरफ्तार नेताहरुलाई बिनासर्त तुरुन्त रिहा गर्न माग गरेका छन् । साथै राजश्वमारा एनसेल, सरकारी जग्गा हडप्ने भूमाफिया र घिमिरेको गैरन्यायिक हत्या गर्ने दलाल फासीवादी सरकारको प्रतिरोध गर्न समेत अध्यक्ष ढकालले विज्ञप्तिमार्फत अपिल गरेका छन् ।

अखिल (क्रान्तिकारी) विप्लव नेतृत्वको ने.क.पा.निकट विद्यार्थी संगठन हुन् । उक्त संगठनसहित वैद्य नेतृत्वको नेकपा (क्रान्तिकारी माआवादी) निकट र गोपाल किराँती नेतृत्वको नेकपा (माओवादी केन्द्र)निकट संगठनले संयुक्त रुपमा हिजो दिउँसो १ बजे शान्तिबाटिका आयोजित विरोधसभा स्थलबाटै ती चार विद्यार्थी नेताहरुलाई प्रहरीले बल प्रयोग गरी गिरफ्तार गरेको थियो ।

अहिले चारै जनालाई महानगरीय प्रहरी परिसर काठमाडौंको टेकु हिरासतमा राखिएको जनाइएको छ । गत फागुन २८ गते एकाएक ने.क.पा.माथि सरकारले प्रतिबन्ध लगाउने निर्णय लिएपछि पार्टी र उसका भातृ संगठनहरुमाथि समेत दमन र धरपकड जारी राखेको छ ।

विज्ञप्तिकाे पूर्ण पाठ: