पुस १६, दाङ । दाङमा बसको ठक्करबाट एक विद्यार्थीको मृत्यु भएको छ ।

घोराही–तुलसीपुर सडकखण्ड अन्तर्गत तुलसीपुरको दुधरासमा बसको ठक्करबाट तुलसीपुर १७ झिङ्गैका ७ वर्षीय सागर चौधरीको मृत्यु भएको हो ।

तुलसीपुर–१८ स्थित जनकल्याण माध्यमिक विद्यालयबाट घर फर्कदै गरेका बालक चौधरीलाई भे १ ख ३६९७ नम्बरको बसले बेलुकी साढे ४ बजे ठक्कर दिएको इलाका प्रहरी कार्यालय तुलसीपुरका प्रहरी प्रवक्ता नवचन्द्र मल्लले जानकारी दिए । बसको ठक्करपछि बालकको घटनास्थलमै मृत्यु भएको प्रहरीले जनाएको छ ।

दुर्घटना पछि केही समय घोराही-तुलसीपर सडकखण्ड अवरुद्ध गरिएको थियो । साथै विद्यार्थी तथा अभिभावकहरुले ठक्कर दिने गाडी तोडफोड गरेका छन् भने प्रहरीको भ्यानमा समेत क्षती पुर्याएको जनाईएको छ ।