३३ किलो सुन तस्करी प्रकरण : युएईमा पक्राउ परेका आरोपीलाई काठमाडौं ल्याइयो


असार २७, काठमाडौं । ३३ किलो सुन तस्करी प्रकरणमा युएईमा पक्राउ परेका एक आरोपीलाई नेपाल ल्याइएको छ । २०७५ माघमा यूएई पक्राउ परेका हरिशरण खड्कालाई आवश्यक कानूनी प्रक्रिया पुरा गरेर शनिबार काठमाडौं ल्याइएको हो ।

उनलाई त्रिभुवन अन्तर्राष्ट्रिय विमानस्थलले काठमाडौं उत्रिएपछि गौशाला प्रहरीको जिम्मा लगाएको छ । ३३ किलो सुन तस्करी प्रकरणमा खड्कासहित १२ जनाविरुद्ध अन्तर्राष्ट्रिय प्रहरी संगठन (इन्टरपोल) मा रेड नोटिस जारी भएको थियो ।

काभ्रे घर भएका ४२ वर्षीय खड्का एक दशकयता यूएईमै बस्दै आएका थिए । वैदेशिक रोजगारीका लागि गएका उनी पछिल्ला वर्षहरुमा जागिर छाडेर सुन तस्करीमा लागेको अनुसन्धानकर्ताहरु बताउँछन् ।

यसअघि केन्द्रीय अनुसन्धान ब्यूरो (सीआईबी) ले २१ पुस ०७३ मा बरामद गरेको साढे ३३ किलो सुन प्रकरणमा पनि उनी मुछिएका थिए । नेपालमा रहेका सुन व्यवसायीसँग मिलेर उनले दुबईबाट सुन पठाउने काम गर्दै आएको खुलेको थियो ।

पछिल्ला वर्षहरुमा मोरङ, उर्लाबारीका चुडामणि उप्रेती ‘गोरे’ मार्फत उनले सुन नेपाल भित्र्याउने गरेको उच्च स्तरीय सुन अनुसन्धान समितिले सार्वजनिक गरेको थियो ।

२०७७ असार २७,शनिबार को दिन प्रकाशित

प्रतिक्रिया दिनुहोस

ताजा अपडेट

धेरै पढिएको