प्रदेश ५ को राजधानी सार्न खोजिएको होइन, बनाउन खोजिएको हो: मुख्यमन्त्री पोखरेल


असोज २०, बुटवल । प्रदेश ५ का मुख्यमन्त्री शंकर पोखरेलले प्रदेश सार्न खोजेको नभई बनाउन लागेको बताएका छन्। बुटवल अस्थायी राजधानी तोकिएकाले सार्न खोजेका रुपमा नबुझ्न आग्रह गरेका छन्। राजधानी बनाउने काम बाँकी नै रहेकाले त्यो दाङको भालुवाङमा बनाउन लागिएको उनले बताए।

उनले भने, ‘एउटा चर्चा चल्यो प्रदेश सार्न खोजियो। सार्न होइन बनाउन खोजेको हो। प्रदेश राजधानी कहाँभन्दा पनि कस्तो बनाउने भन्ने बारे सोचौं। प्रस्तावित ठाउँले साझा मनोविज्ञान निर्माण गर्छ।’

यसको निर्णय आफूले मात्रै नगरेको उनले स्पष्ट पारे। प्रदेश सभाका सांसदहरु मध्येबाटै बनाइएको विशेष समितिको प्रतिवेदनलाई कार्यान्वयन गरेको उनले बताएका छन्। दाङ राजधानी बनाउने कुरा उक्त प्रतिवेदनमा पहिलो विकल्पका रुपमा राखिएले त्यसलाई प्राथमिकता दिइएको उनको भनाइ छ।

प्रदेश सभालाई सम्बोधन गर्दै उनले भने, ‘उक्त समितिले दिएको प्रतिवेदन एकातिर र प्रदेश सरकारले अर्कातिर निर्णय गरेको भए विरोध जायज हुन्थ्यो।’

प्रदेशको राजधानी र नाम तोक्ने विषयमा प्रदेश सभाभित्रका सांसदहरुको विशेष समिति बनाइएको उनले स्मरण गरे।

विशेष समितिले पहिलो विकल्पमा दाङ, दोस्रोमा रुपन्देही र तेस्रो कपिलबस्तु राजधानी तोक्ने प्रतिवेदन दिएको उनले बताए। यसका लागि राप्ति र भेरीका सांसद लुम्बिनी र लुम्बिनीका सांसदलाई राप्ति र भेरीमा पठाइएको उनले बताए।

उनले भने, ‘विशेष समिति आफैंले यो प्रतिवेदन दिएको हो। उपयुक्त निष्कर्ष निकालियोस् भन्ने म्यान्डेट पनि दिएको हो। सरकार समितिअनुसार नै चलेको हो।’

उनले सम्बोधनको सुरुवातमा एक आमाले प्रसव वेदना सहनुपरे जस्तै राजधानी तोक्ने प्रक्रिया पनि त्यस्तै रहेको बताए। नयाँ इतिहास निर्माण गर्दा समाजले त्यस्तै प्रसव वेदना सहनुपर्ने उनको भनाइ थियो। नयाँ कामका लागि असहजता हुने बताउँदै त्यसलाई स्वाभाविक रुपमा लिन आग्रह गरे।

२०७७ आश्विन २०,मंगलवार को दिन प्रकाशित

प्रतिक्रिया दिनुहोस

ताजा अपडेट

धेरै पढिएको