मङ्सिर २०, काठमाडौँ । हुम्ला जिल्लामा जीप दुर्घटना हुँदा ४ जनाको मृत्यु भएको छ भने एक बच्चा सहित ७ जना घाइते भएका छन्।

सिमकोट गाउपालिका ७ डाडाफयाको जबुका नजिकैे शुक्रबार राती लु.२ च २१०२ नंम्बरको बोलेरो जीप दुर्घटना भएको हो।

जिल्ला प्रहरी कार्यालय हुम्लाका अनुसार हुम्ला सदरमुकाम सिमिकोट देखि बिरामी लिन बोलेरो जीप हेप्काखोला गएको थियो। बिरामी ल्याएर फर्कने क्रममा दुर्घटनामा परेको हो। सिमिकोट गाउँपालिका ७ डाँडाफयामा राति १० बजे जीप दुर्घटनामा परेको हो।

दुर्घटनामा परी मृत्यु हुनेहरुमा सिमकोट७ का ३० वर्षिय पर्वत सुनार, सिमकोट २ का पारस बोहरा, नाम्खा १ हेप्का का ४५ वर्षिय डुकी तामाङ र उनका श्रीमान ४५ वर्षिय गुरु तामाङ रहेको जिल्ला प्रहरी कार्यालय हुम्लाका प्रहरी नायव उपरीक्षक सूर्यप्रकाश सुवेदीले जानकारी दिए ।

घाईते हुनेमा सिमकोट २ ठेहेका जीप चालक सिंगम भण्डारी, सिमकोट ६ बस्ने प्युठानका अजय बस्नेत, सिमकोट ८ खोल्सीकी कल्पना सिंह, १ बर्षे बालक मिलन सिंह, सम्झना शाही, नाम्खा गाउँपालिका वडा नं. १ की झुमझुम लामा र सिमकोट बजारमा बस्ने बाजुराका कवि सिंह रहेका छन्।

घाइतेहरुको हुम्ला जिल्ला अस्पतालमा उपचार भइरहेको छ । घाइते मध्ये २ जनाको अवस्था गम्भिर रहेको र बच्चा सहित ५ जनाको अबस्था सामान्य भएको जिल्ला प्रहरी कार्यालय हुम्लाले जनाएको छ।

जीप सडक भन्दा झण्डै ६ सय मिटर तल खसेको बताइएको छ । उद्धारकार्यमा नेपाल प्रहरी, सशस्त्र प्रहरी, नेपाली सेना र स्थानीयवासी खटिएका थिए ।

जिप दुर्घटनाको कारण भने खुल्न नसकेको प्रहरीले जनाएको छ ।