आगामी बजेट श्रमिक वर्ग केन्द्रित बनाउन उपराष्ट्रपतिको ध्यानाकर्षण


बैशाख १९, काठमाडौँ । उपराष्ट्रपति नन्दबहादुर पुनले सरकारलाई आगामी बजेट निर्माण गर्दा श्रमिक वर्गलाई विशेष ध्यान दिन ध्यानाकर्षण गराएका छन् ।

अन्तर्राष्ट्रिय श्रमिक दिवसको अवसरमा शुभकामना सन्देश दिँदै उपराष्ट्रपति पुनले कोभिड–१९ को महामारीबाट देशभित्र उत्पन्न हुने बेरोजगारी र देशको अर्थतन्त्रमा पर्ने प्रभावका बारेमा ध्यान दिन र तयारी गर्न म सरकारको ध्यानाकर्षण गराएका हुन् ।

पुनले भनेका छन्, ‘लकडाउन लम्बिदै जाँदा काममा जान नपाउने र रोजगारी खोसिने अवस्थाले श्रमिक वर्गको आगामी दिन झनै कठिन बन्ने परिदृष्यहरु देखा परिरहेका छन् । तर, सबैखाले चुनौतीको सामना गर्न तयार रहनुको विकल्प हामीसँग छैन । विश्वजगतले नै आगामी आफ्ना कार्यक्रमहरु श्रमिक वर्ग केन्द्रित बनाउने र नेपाल सरकारले आगामी बजेट निर्माणमा यसमा उचित ध्यान दिने मैले विश्वास लिएको छु ।’

‘कोरोनाका कारण अन्तर्राष्ट्रिय श्रम बजारमा रहेका लाखौं नेपालीले रोजगारी गुमाउन सक्ने, त्यसबाट देशभित्र उत्पन्न हुने बेरोजगारी र देशको अर्थतन्त्रमा पर्ने प्रभावका बारेमा ध्यान दिन र तयारी गर्न म सरकारको ध्यानाकर्षण गराउन चाहन्छु ।’

उपराष्ट्रपति पुनले श्रमिक मजदुरहरुको हकहितका लागि भएको संवैधानिक व्यवस्थाको कार्यान्वयनलाई यो कठिन अवस्थामा अझै प्रभावकारी बनाउनु पर्नेमा पनि जोड दिएका छन् ।

महामारीबाट सबैभन्दा बढी श्रमिक वर्ग प्रभावित भएको स्वदेश तथा विदेशमा रहेका लाखौं नेपाली श्रमिकको अवस्था कठिन बनिरहेको उनको भनाइ छ । ‘विश्व श्रम बजारमा रहनुभएका सयौं नेपालीहरु कोरोना भाइरसबाट संक्रमित हुनुभएको छ । म यस अवसरमा विभिन्न देशमा रोजगारीको क्रममा कोरोना भाइरसबाट ज्यान गुमाउनुभएका नेपालीहरुप्रति श्रद्धाञ्जली अर्पण गर्दछु । भाइरसबाट संक्रमित हुनुभएका नेपालीहरुको शीघ्र स्वास्थ्य लाभको कामना गर्दछु,’ उनले विज्ञप्तिमा भनेका छन् ।

२०७७ बैशाख १९,शुक्रबार को दिन प्रकाशित

प्रतिक्रिया दिनुहोस

ताजा अपडेट

धेरै पढिएको