चैत ११, काठमाडौं । आज (सोमबार) र भोलि (मंगलबार) देशका धेरैजसो ठाउँमा मेघ गर्जनसहित वर्षा हुने सम्भावना रहेको जल तथा मौसम पूर्वानुमान महाशाखाले जनाएको छ ।

मौसमविद् गंगा नगरकोटीका अनुसार देशको पश्चिमी भागबाट पश्चिमी वायु प्रवेश गरेकाले वर्षा हुने भएको हो।

‘उक्त वायु सुर्खेत र दाङलगायत आसपासका क्षेत्रमा आइसकेको छ । बेलुकीसम्म यो मध्य र पूर्वी क्षेत्रका पहाडी भूभागमा आइपुग्नेछ,’ मौसमविद् नगरकोटीले भनिन्,‘जसले मेघ गर्जनसहित वर्षा गराउनेछ ।’

उनका अनुसार पश्चिमी क्षेत्रका केही स्थानमा दिउँसो तथा बेलुकी मध्य र पूर्वी क्षेत्रका पहाडी भूभागमा मेघ गर्जनसहित पानी पर्नेछ । तराई क्षेत्रमा भने आज पानी पर्ने छैन । तर घाम भने राम्रोसँग नलाग्ने उनले बताइन् ।

पश्चिमी उच्च पहाडी र हिमाली तथा मध्य र पूर्वी उच्च पहाडी र हिमाली भेगमा हल्का देखि मध्यमसम्म हिमपातको सम्भावना रहेकाे मौसम पूर्वानुमान महाशाखाले जनाएकाे छ ।

मंगलबार पनि देशका अधिकांश स्थानमा सामान्य देखि पूर्ण बदली भइ पहाडी भू-भागमा मेघ गर्जनसहित वर्षाको सम्भावना छ । उच्च पहाडी र हिमाली क्षेत्रहरूमा हिमपातको सम्भावना छ ।

‘मौसम पर्सि (बुधबार) मात्र खुल्ने देखिएको छ,’ मौसमविद् नगरकोटीले भनिन्,‘पर्सि पनि पूर्वी क्षेत्रमा भने हल्का वर्षा हुने सम्भावना छ ।’