चैत २२, बुटवल । प्रदेश ५ सरकारले प्रदेश २ मा आएको हावाहुरी पीडितलाई राहत तथा सहयोगका लागि १ करोड रूपैयाँ सहयोग गर्ने भएको छ ।

शुक्रबार बसेको मन्त्रिपरिषद बैठकले प्रदेश २ सरकारको खाता जाने गरि १ करोड रूपैयाँ सहयोग गर्ने निर्णय गरेको सरकारका प्रवक्ता तथा भौतिक पुर्वाधार विकास मन्त्री वैजनाथ चौधरीले जानकारी दिए ।

यस्तै सरकारले क्यान्सरको उपचार गरिरहेका प्रदेश ५ नेपाली कांग्रेस संसदीय दलका नेता बलदेव शर्मा पोखरेललाई उपचारका लागि ५ लाख रूपैयाँ दिने निर्णय गरेको छ । सरकारले विद्युत नपुगेका गाउँमा सौर्य उर्जाका लागि स्थानीयलाई ९० प्रतिशतसम्म अनुदान दिने निर्णय गरेको प्रवक्ता चौधरीले जानकारी दिए ।

सरकारले प्रदेश सभामा दर्ता गरेको लोकसेवा आयोगसम्बन्धी विधेयक फिर्ता लिएर संघीय सरकारको लोकसेवासम्बन्धी कानुनअनुसारकै विधेयक प्रदेश सभामा दर्ता गर्न स्वीकृत प्रदान गरेको छ ।

बैठकले प्रदेशको आवधिक योजनाको आधारपत्र पारित गरेको छ । यस्तै सरकारले गाउँ सभा, नगरसभा कार्यसञ्चालन व्यवस्था गर्न बनेको विधेयक प्रदेश सभामा दर्ता गर्न स्वीकृति प्रदान गरेको छ।