विकासमन्त्रीको कार्यक्रम: जनताको करबाट साइनबोर्ड उद्घाटन गर्न सवा लाख खर्च


कार्तिक १३, चरिकोट। खारेज भएपछि प्रदेश सरकारअन्तर्गत नयाँ स्थापना भएको कार्यालयको करिब १२ सय रुपैयाँ पर्ने साइनबोर्डको उद्घाटन गर्न दोलखाको चरिकोटमा एक कार्यालयले सवा लाख खर्च गरेको छ।

सिँचाइ विकास डिभिजन र जलउत्पन्न प्रकोप नियन्त्रण डिभिजन कार्यालय खारेज भई नयाँ स्थापना भएको जलस्रोत तथा सिँचाइ विकास डिभिजन कार्यालय चरिकोटको करिब १२ सय पर्ने साइनबोर्ड उद्घाटन गर्न करिब १ लाख २० हजार खर्च गरिएको हो।

प्रदेश ३ सरकारका भौतिक पूर्वाधार विकासमन्त्री केशव स्थापितले सो कार्यालयको साइनबोर्ड आइतबार उद्घाटन गरेका हुन्।

नयाँ उद्घाटित कार्यालयले नै मन्त्री स्थापितको बसोबासका लागि ३२ हजार ६ सय १४ रुपैयाँ खर्च गरेको छ। जलस्रोत तथा सिँचाइ विकास डिभिजन कार्यालय दोलखाको साईनबोर्ड उद्घाटन गर्न मन्त्री स्थापित शनिबार राति आफ्ना छोरा बुहारीसहित जिल्लाकै सबैभन्दा महंगो पानोरमा रिसोर्टमा बास बसेका थिए।

पुनर्संरचित कार्यालय तथा नयाँ कार्यालय प्रमुख प्रकाश अधिकारी हाजिर भएकै कारण निकै तामझामका साथ साइनबोर्ड उद्घाटन गरिएको कार्यक्रमका सहभागीको अनुमान थियो। इन्धन करिब १५ हजार, मञ्च व्यवस्थापन तथा साउण्ड सिस्टम १५ हजार, खाजा ३६ हजार, अन्य ब्यानर चार हजार, चिया एक हजार, खादा तीन हजार, पानी एक हजार गरी कार्यालयको करिब १ लाख २० हजार जति खर्च भएको एक कर्मचारीले बताए।

साइनबोर्ड उद्घाटनका लागि खासै बजेटको व्यवस्था नभए पनि विभिन्न योजनाको ओभरहेड वापतको रकमबाट बिल भुक्तानी गरिने ती कर्मचारीको भनाइ छ। खर्च गराईको अनुपात हेर्दा कार्यालयको निर्माणाधीन दुईवटा भवन उद्घाटन कार्यक्रममा कति खर्च होला भन्ने सहजै अनुमान लगाउन सकिने सहभागीको भनाइ छ।

त्यत्रो खर्च गरेर आयोजना गरिएको साइनबोर्ड उद्घाटन कार्यक्रममा मन्त्री स्थापितले आदर्शका कुरा बाहेक आफ्नो विषयवस्तुमा खासै टिप्पणी गरेनन्। मन्त्री स्थापितले मन्तव्य राखिरहेकै बेला एक सहभागीले भने, ‘निकै आदर्शका कुरा गरे मन्त्रीले तर आपूm साइनबोर्ड उद्घाटन कार्यक्रममा आएको भुलेछन्।’

तामझामपूर्ण साइनबोर्ड उद्घाटनको विषयमा प्रतिक्रिया लिन खोज्दा कार्यालय प्रमुख अधिकारी सम्पर्कमा आउन चाहेनन्। जिल्लामा प्रदेश सरकारअन्तर्गत स्थापना भएका डिभिजन वन, पशु औषधालय, किवीजोन लगायतका कार्यालयले भने स्टेसनरी खर्च कटाएर कार्यालयको साइनबोर्ड स्थापना गरेको पाइएको छ ।

२०७५ कार्तिक १३,मंगलवार को दिन प्रकाशित

प्रतिक्रिया दिनुहोस

ताजा अपडेट

धेरै पढिएको