मङ्सिर ७,दाङ। फ्राइडे रिलिज अन्तर्गत आज शुक्रबारबाट प्रदर्शनमा आएको विग बजेट फिल्म ‘ड्रिम गर्ल’ले दाङ सहित देशभरबाट सुखद प्रतिक्रिया प्राप्त गरेको छ।
नायक आकाश श्रेष्ठ र निर्देशक ऋषिराज आचार्यको गृहजिल्ला दाङका दर्शकले ‘ड्रिम गर्ल’ पुर्ण मनोरञ्जनात्मक भएको र फिल्म हेरुनजेल दर्शकलाई बाधेर राख्ने सक्ने खालको भएको बताएका छन् । दाङमा ‘ड्रिम गर्ल’ हेरेका धेरैजसो दर्शकले फिल्मको स्टोरी,आकाश र आश्माको त्यो सुहाएको जोडी र रारा देखि थाइल्यान्डसम्मको मनमोहक दृश्यलाई औधी रुचाएका छन् ।
उता राजधानी काठमाडौ सहित देशका प्रमुख शहरहरुमा पनि फिल्मको व्यापार र प्रतिक्रिया सुखद रहेको र माउथ पब्लिसिटी उत्कृष्ट भएकाले भोलिबाट फिल्मको व्यापार अझ बढ्दै जाने निर्देशक आचार्यले बताए ।
नेपाल र थाइल्याण्डमा खिचिएको फिल्म ‘ड्रिम गर्ल’ मा आकाश श्रेष्ठ र आश्मा गिरिको साथमा शिशिर भन्डारी,विल्सन विक्रम राई ,सरोज खनाल, अर्जुन श्रेष्ठ, पूजा पराजुली, निर्मल शर्मा, लक्ष्मी गिरी,रश्मी भट्ट, सुरवीर पण्डितलगायतले पनि अभिनय गरेका छन् ।
लभस्टोरी जनरामा बनेको फिल्मलाई डि.सि.एन.ले वितरणको जिम्मा लिएको छ। दक्षिण भारतको रिल एण्ड रियल सिनेमा कम्पनी सँगको सहकार्यमा आर.बि मुभीजको ब्यानरमा बनेको फिल्मको निर्मातामा निर्देशक ऋषिराज आचार्य , अर्जुन शर्मा र रामेश्वर घिताल रहेका छन् । राहुल राईले खिचेको फिल्ममा अर्जुन पोखरेलको संगीत र गम्भीर बिष्टको कोरियोग्राफी रहेको छ ।
प्रतिक्रिया दिनुहोस