नेकपा हुम्लाले गर्यो पार्टी कार्यालय उद्घाटन


रेशमराज रोकाया/पुस ३, हुम्ला । तत्कालिन एकिकृत नेकपा माओवादी (केन्द्र) र नेकपा (एमाले) एकिकरण भएको लामो समय पछि हुम्लाको पार्टी कार्यलयको उद्घाटन भएको छ ।

पार्टी एकिकरण पछि कर्णाली प्रदेशको जिम्मेवारी र प्रदेश समितिको चयन पछि हुम्लामा नेकपाको कार्यलय औपचारिक रुपमा उद्घाटन गरिएको हो ।
नेकपाका कर्णाली प्रदेशका अध्यक्ष गोरख बहादुर वोगटीले गर्नु भएको उद्घाटन कार्यक्रममा नेकपाका केन्द्रिय सदस्य विजय भण्डारी, कर्णाली प्रदेश समितिका सदस्य तथा सामाजिक विकास मन्त्री दल रावल, कर्णाली विकास आयोगका सदस्य डा. दिपेन्द्र रोकायाको समेत उपस्थिती रहेको थियो ।

पार्टीको अगुवा कार्यकर्तालाई प्रशिक्षण र हुम्लाका स्थानिय तहमा पार्टी समिति चयन, प्रशिक्षण लगायतका कार्यक्रमको साथमा पार्टीलाई एक ढिक्का बनाई अझ पार्टी सुदृढीकरणको अभियानमा लाग्नको लागि सबै एक हुनु पर्नेमा बक्ताको जोड रहेको थियो ।

कार्यक्रममा सम्बोधन गर्दै कर्णाली प्रदेश समितिका अध्यक्ष गोरख बहादुर वोगटीले देशमा नेकपाको दुई तिहाई बहुमतको सरकारले हाल सम्म देशमा नभएका परिवर्तन पाँच वर्षमा गरी देखाउने जिकिर गर्नु भयो । सम्वृृद्ध देश निर्माणमा नेकपाको सरकार लागि परेको र आगामी दिनमा यसको अझ रफ्तार बढ्ने बताउनु भयो ।

आजै जिल्ला समन्वय समितिको सभा कक्षमा जिल्लाका अगुवा कार्यकर्तालाई प्रशिक्षणपनि दिईएकोछ । प्रशिक्षण पछि सम्पूर्ण टोली गाउँपालिका स्तरको समिति चयनमा गाउँमा अभियान सहित परिचालन गरिने कार्यक्रम रहेको नेकपा केन्द्रिय सदस्य विजय भण्डारीले बताउनु भयो ।

हुम्लाको पार्टी एकिकरणको ईन्चार्ज समेत जिम्ममा पाएका भण्डारीले नेकपाको सरकारले गरेको राम्रा कामको बारेमा जनस्तरमा प्रचार प्रसार गर्ने, पार्टी सुदृढीकरणको लागि ग्रामिण स्तरबाट सुझाव सल्लाह सहित नयाँ पार्टी निर्माणको अभियानमा लाग्ने योजना रहेको भण्डारीले बताउनु भयो ।

जिल्लाको स्थानिय तहको पार्टी समिति निर्माण पछि जिल्लामा नेकपाको सम्पूर्ण गतिविधिलाई चुस्ता बनाउनको लागि समेत एक कार्यदल बनाईएको छ । कार्यदलले पार्टीको हरेक तह तप्कालाई सन्तुलित बनाई आगमी दिनमा पार्टीलाई सुदृढ बनाउनको लागि सबैले लाग्नु पर्नेमा सामाजिक विकास मन्त्री दल बहादुर रावलले बताउनु भयो ।

तस्बिरमा : पार्टी एकिकरण पछि हुम्लामा नेकपाको पार्टी कार्यलयको साईनबोर्ड उद्घाटन पछि दायाँबाट क्रमशः सम्वोधन गर्दै कर्णाली प्रदेश अध्यक्ष गोरख बहादुर बोगटी, नेकपा केन्द्रिय सदस्य विजय भण्डारी, सामाजिक विकास मन्त्री दल रावल र कर्णाली विकास आयोगका सदस्य डा. दिपेन्द्र रोकाया । तस्बिर: रेशमराज रोकाया, हुम्ला

२०७५ पुष ३,मंगलवार को दिन प्रकाशित

प्रतिक्रिया दिनुहोस

ताजा अपडेट

धेरै पढिएको