ओलीलाई बामदेवको चुनौती: संविधान संशोधन गरेर दुवैजना प्रधानमन्त्री बन्नुस्


२ पुस, काठमाडौं । नेपाल कम्युनिष्ट पार्टी (नेकपा)का अध्यक्ष तथा प्रधानमन्त्री ओलीले आफ्नो फरक मतलाई मजाक बनाएको र हल्का टिप्पणी गरेको भन्दै नेता बामदेव गौतम स्थायी कमिटी बैठकमा थप आक्रामक बनेका छन् ।

बैठकको शुरुमै बोल्ने समय पाएका गौतमले प्रधनमन्त्री ओलीले माफी माग्नु पर्ने चेतावनी दिएको स्रोतले जनाएको छ, अनलाइन खबरमा समाचार छ । सोमबार आफ्नो फरक मतको औचित्य पुष्टि गर्दै गौतमले प्रधानमन्त्री केपी शर्मा ओलीप्रति तीव्र आक्रोश व्यक्त गरेका हुन् ।

ओलीले आइतबार आयोजित पार्टी निकट वकिलहरुको कार्यक्रममा बामदेवलाई सांकेतिक जवाफ दिएका थिए ।

बामदेवले फरक मत राख्ने क्रममा ओलीले अध्यक्षको भूमिका निर्वाह गर्न नसकेको भन्दै प्रचण्डलाई जिम्मा दिनुपर्ने बताएका थिए । त्यसको जवाफमा ओलीले ‘संविधानले मिल्दैन, नत्र दुईटा प्रधानमन्त्री बनाउन हुन्थ्यो’ भन्दै व्यंग्यात्मक जवाफ दिएका थिए ।

नेता गौतमले भने पार्टी बैठकमा उठेको कुरालाई सार्वजनिक रुपमा मजाकको विषय बनाएकोमा आपत्ति जनाएका छन् । उनले पार्टी र सरकार स्वेच्छाचारी ढंगले चलाएको र हावादारी कुरा गरेको भन्दै ओलीमाथि कडा प्रहार गरेको एक नेताले बताए ।

सचिवालय सदस्यसमेत रहेका गौतमले भने ‘प्रधानमन्त्री र पार्टी अध्यक्षजस्तो व्यक्तिले मजाक गर्न सुहाउँछ ? मिल्ने भए प्रधानमन्त्री पनि दुबै जना हुने थियौं भनेर मजाक गर्ने ? दुई तिहाई छँदैछ तपाईसँग, संविधान संशोधन गर्नुस न । बनाउनुस् दुवैजना प्रधानमन्त्री ।’

गौतमले शनिबारकै बैठकमा लिखित धारणा स्थायी कमिटी सदस्यहरुलाई बाँडेका थिए । सोमबार त्यसबारे प्रष्ट्याउने क्रममा ओलीको चर्को आलोचना गरेका हुन् ।

आफूलाई चुनावदेखि पेलेको र विभिन्न नाममा बदनाम गर्दा पनि आफू मौन बसेको भन्दै गौतमले बैठकमा भने, ‘अब आत्मरक्षाका लागि बोल्न बाध्य भएँ ।’

२०७५ पुष २,सोमबार को दिन प्रकाशित

प्रतिक्रिया दिनुहोस

ताजा अपडेट

धेरै पढिएको