साउन १५ – प्रि–सिजन एल क्लासिकोमा बार्सिलोना विजयी भएको छ । प्रि–सिजन भ्रमण अन्तर्गत अहिले अमेरिकामा रहेका स्पेनिस दुई महारथी रियल मड्रिड र बार्सिलोनाबिच आइतबार बिहान भएको अन्तर्राष्ट्रिय कप अन्तर्गतको मैत्रीपूर्ण खेलमा बार्सिलोनाले रियल मड्रिडलाई ३–२ ले हराएको हो ।

अमेरिकाको मायामीमा रहेको हार्ड रक रंगशालमा भएको एल–क्लासिकोमा सुरुमा नै बार्सिलोनाले अग्रता लिएको थियो । तेस्रो मिनेटमा नै स्टार स्ट्राइकर लियोनल मेस्सीले गोल गर्दै सुरुवाति अग्रता दिलाए । त्यसको तीन मिनेटपछि पेरिस सेन्ट जर्मेन (पिएसजी) जाने तयारीमा रहेका नेइमारको पासमा इभान रेकिटिकले गोल गर्दै बार्सिलोनालाई २–० को अग्रता दिलाए । तर त्यसपछि रियल मड्रिड खेलमा फर्कियो । १३ औं मिनेटमा कोभाकिकले रियल मड्रिडका लागि पहिलो गोल गरे । स्टार स्ट्राइकर क्रिष्टियानो रोनाल्डो बिना खेलेको रियल मड्रिडका लागि ३५ औं मिनेटमा एसेनसिओले गोल गरेपछि पहिलो हाफमा २–२ को बराबरी भयो । तर दोस्रो हाफमा बार्सिलोनाले एक गोल थप गर्‍यो । बार्सिलोनाका लागि ४९ औं मिनेटमा नेइमारको पासमा जेराड पिकेले गोल गरे । दोस्रो हाफमा रियल मड्रिडले गोल गर्ने केही राम्रा मौका खेर फालेपछि पराजित भयो । च्याम्पियन्स लिग तथा ला लिगा च्याम्पियन रियल मड्रिड एल–क्लासिकोमा स्टार स्ट्राइकर क्रिष्टियानो रोनाल्डो बिना नै खेलेको हो । बार्सिलोनाबाट भने पिएसजी जाने तयारीमा रहेको भनिएका नेइमार तथा लियोनल मेस्सी र लुइस स्वारेज पनि खेलेका थिए । रियलको टिममा रोनाल्डो नरहे पनि सर्जियो रामोस, ग्यारेथ बेल, करिम बेन्जिमा, मार्सेलो, कासमेइरोसहितका स्टार थिए ।