पोष्टपाटी!

एक्कासी युएई भ्रमणमा देखिएका माओबादी केन्द्रका पोलिटब्युरो सदस्य टोप बहादुर रायमाझी प्रति प्रबासमा रहेको आफ्नै भातृसंगठनका युवाहरुले असन्तुष्टि पोखेका छन्। पूर्व उपप्रधान तथा उर्जामन्त्री रायमाझीको भ्रमण प्रति अस्पस्टता जनाउदै युएईमा रहेको नेपाली जन प्रगतिशील मंचका प्रबक्ता अनिस तामाङले युएई आएको बारे थाहा नपाएको भन्दै लामो असन्तुष्टि पोखेका छन।

प्रवक्ता तामाङले भनेका छन् “हामी यहाँ १२ घन्टा गोरु जोताई काम गरेर पार्टी र संगठनको लागि मरिमेटेर हिडेको कुनै स्वार्थ पुरा गर्नको लागि हैन कमरेड ! पार्टीले खाडी मुलुकको संगठनलाई हेर्ने दृष्टिकोण देख्दा जोसजाँगर मरेर आउछ।”

उनले अत्यन्त भावनात्मक मर्म पोख्दै भनेका छन् “तपाईंहरुलाई त्यो ठाउमा पुर्याउने ८०% योद्धाहरु आज उदास हुदै खाडीमा पसिना बेचिरहेका छन। हामी तिनै निराश मनहरुलाई हौसला दिदै विकेन्द्रित कार्यकर्ताहरुलाई केन्द्रित बनाएर एउटा शक्तिमा बदलेको छौँ !” तामाङ अगाडी भनेका छन् “हाम्रो संगठन अरु पार्टीको तुलनामा धेरै माथि छ किनकि हामी संग अझै हिजोको क्रान्तिकारी जोस मरेको छैन।”

माओबादी केन्द्रका नेता टोप बहादुर रायमाझी अगस्त ४ तारिखमा युएई आए लगतै आफ्ना जिल्लाबासिहरु संग भेटघाट कार्यक्रममा व्यस्त रहनु भएको थियो। तर युएईमा अन्य पार्टीहरु भन्दा राम्रो वर्चस्व जमाएर बसेको जन प्रगतिशील मंच संग बिदेश बिभाग मार्फत युएइमा रहेको संगठनलाई कुनै जानकारी नभएको स्रोतले बताएको छ। फलस्वरूप पार्टी प्रति निष्ठावान कार्यकर्ताहरुले यस्तो असन्तुष्टि पोखेका हुन्।

रायमाझी नितान्त व्यक्तिगत काममा युएई भ्रमणमा रहेको भएपनि अर्घाखाँची सम्पर्क समिति युएईको चौथो अधिबेशनमा भाग लिनु भएको थियो। अधिबेशनमा उपस्थित जिल्लाबासिलाइ प्रशिक्षण दिदै जिल्लामा आफुले गरेको बिकासको फेहरिस्त पनि सुनाउनु भएको थियो ।

पार्टीका नेताहरु बिदेस भ्रमणमा जाँदा उक्त देशमा रहेका संगठनहरुलाई आधिकारिक जानकारी गराउनु पर्ने हो तर दुखको कुरा गराउनु भएन, माओबादी केन्द्रका निकट एक व्यक्तिले पोष्टपाटी संग भने।

पार्टी अन्तर संघर्ष भित्र संधै गुटउपगुटको खेमामा उभ्याइने रायमाझीलाई क्षेत्रीयताबादीको बिल्ला पनि भिराइने गरिन्छ। उनको युएई भ्रमण पछी देखिएको भेटघाट कार्यक्रमलाई हेर्दापनि क्षेत्रीयताको आरोप लाउनेहरुलाइ मल्जल भएको अनुमान सजिलै गर्न सकिन्छ।

हेर्नुहोस नेपाली जन प्रगतिशील मंच युएइका प्रबक्ता तथा माओबादी केन्द्र निकट प्रेस सेन्टर नेपाल युएइको संयोजक समेत रहेका अनिस तामाङको आफ्नो भनाई जस्ताको त्यस्तै :-

हाम्रो नेता युएई पाल्नु भएको रहेछ ! समाचार पढेर थाहा पाए ! अब हाम्रो नेतालाई न कार्यकर्ता चाहियो न त संगठन नै ! हामी यहाँ १२ घन्टा गोरु जोताई काम गरेर पार्टी र संगठनको लागि मरिमेटेर हिडेको कुनै स्वार्थ पुरा गर्नको लागि हैन कमरेड ! पार्टीले खाडी मुलुकको संगठनलाई हेर्ने दृष्टिकोण देख्दा जोसजाँगर मरेर आउछ।

तपाईंहरुलाई त्यो ठाउमा पुर्याउने ८०% योद्धाहरु आज उदास हुदै खाडीमा पसिना बेचिरहेका छन। हामी तिनै निराश मनहरुलाई हौसला दिदै विकेन्द्रित कार्यकर्ताहरुलाई केन्द्रित बनाएर एउटा शक्तिमा बदलेको छौँ ! यहाँ अरु पार्टीका पनि विदेश विभाग संगठनहरु छन उहाँहरुको महिनामा १,२ ओटा केन्द्रीय नेताहरु आउदै प्रशिक्षण दिइरहेका पाउछौ। उनिहरुलाई थाहा छ अबको राजनीति कहाँ छन भनेर त्यसैले केन्द्रबाटै नेताहरु आएर कार्यकर्ताहरुलाई राजनीतिक प्रशिक्षण दिएर बौद्धिक रुपमा बलियो बनाउछन तर हाम्रो त्यस्तो छैन तर पनि हाम्रो संगठन अरु पार्टीको तुलनामा धेरै माथि छ किनकि हामी संग अझै हिजोको क्रान्तिकारी जोस मरेको छैन।